(නාමල් පතිරගේ)
ශ්‍රී ලංකාවේ සුපර් ලීග් පාපන්දු තරගාවලියේ මීළඟ වටය ආරම්භ කිරීම ප්‍රමාද විය හැකි බව ශ්‍රී ලංකා පාපන්දු සම්මේලනයේ සභාපති අනුර ද සිල්වා මහතා පවසයි. රට තුළ දැන් උද්ගතව පවතින තත්ත්වයන් හමුවේ මෙම තරගාවලියේ ඉතිරි කොටසේ ඉරණම සම්බන්ධයෙන් කළ විමසීමකදී ඔහු ඒ බව පැවසීය.
ශ්‍රී ලංකා සුපර්ලීග් පාපන්දු තරගාවලියේ අදියර තුනකට අයත් තරග 15 කින් 14 ක් මේ වන විට පවත්වා අවසන් කර තිබේ. නිල කාලසටහනට අනුව එහි සිව් වැනි අදියරේ තරග ලබන ජූලි 2 වැනිදා සිට ආරම්භ කළ යුතුය. එහිදී තරග 31ක් ලබන අගෝස්තු 8 වෙනිදා දක්වා පවත්වා අවසන් කළ යුතුය.
එහි සම්පූර්ණ නිල තරග කාලසටහන තරගාවලිය ආරම්භයේදීම එළි දැක්වීම පාපන්දු සම්මේලනය කටයුතු කළේය.
නාවලපිටිය අප්කන්ට්‍රි ලයන්ස් පිල හා ඩිෆෙන්ඩර්ස් (යුද හමුදා) පිල අතර තරගය එහිදී අත්හිටුවූයේ දෙපිලේ ක්‍රීඩයන් හා නිලධාරීන් සඳහා කළ ඇන්ටිජන් පරීක්ෂාවේ දී පිරිසක් කොවිඩ් ආසාදිතයන් බවට තහවුරු වීමෙනි.
පාපන්දු සම්මේලනයේ සභාපති අනුර ද සිල්වා මහතා මෙසේද පැවසීය.
තරගාවලිය නැවත ආරම්භ කරන්න ජූලි 2 වැනිදා සූදානම් වුණත් ඒ ගැන දැන්ම යමක් කියන්න අමාරුයි. බොහෝ විට රට තුළ කොවිඩ් වසංගතයක් එක්ක බලපාන කරුණු ගැන එතන දී අපට දැඩි අවධානය යොමු කරන්නත් වෙනවා.
ලබන සැප්තැම්බරයේ පැවත්වෙයි කියලා තවම තහවුරු කරලා නැති දකුණු ආසියානු පාපන්දු තරගාවලියේ ශ්‍රී ලංකා සංචිතයේ පුහුණුවීම් පවත්වාගෙන යන්නත් ඔය අතරේ අපට සිද්ධ වෙනවා. කොහොම වුණත් ප්‍රමාදය අවම කර ගනිමින් තරග පවත්වන්න අපි උනන්දු වෙලා ඉන්නවා.
මෙම පළමු තරගාවලිය සඳහා දිරිගැන්වීමක් ලෙස මුල්‍යාධාර සැපයීමට අන්තර් ජාතික පාපන්දු සම්මේලනය ඉදිරිපත්ව සිටියි. ශ්‍රී ලංකා සුපර් ලීග් තරගාවලිය ආරම්භයට පෙර පුහුණු තරග වටයක් පැවැත්වීමට ද පාපන්දු සම්මේලනය කටයුතු කළේය. ඊට තරග 20ක් ඇතුළත් විය.
ශ්‍රී ලංකා සුපර් ලීග් තරගාවලියේ දී මෙතෙක් අළුත්ගම රෙඩ්ස්ටාර්ස් කණ්ඩායමේ දක්ෂතා කැපී පෙනේ. ඔවුන් එහිදී ප්‍රබල කණ්ඩායම් කිහිපයක් පරාජයට පත් කළ අතර අවසන් වරට පැවති (2018) ශූරයන්ගේ ලීග් තරගාවලියේ ශූරතාව දිනු යුද හමුදා (ඩිෆෙන්ඩර්ස්) කණ්ඩායම ගෝල 6 – 0 කින් තරම් ඉහළ අගයකින් පරාජය කිරීමට ද සමත් විය.
කෙසේ වුවත් ක්‍රීඩා සමාජ ප්‍රධානීන් පවසන්නේ සුපර් ලීග් තරගාවලියේ තරග ප්‍රමාදයක් ඇතිවීමෙන් තමන් දුෂ්කරතාවයට පත්වන බවයි. සිය කණ්ඩායම් සඳහා කැඳවා තිබෙන විදේශීය ක්‍රීඩකයන් ශ්‍රී ලංකාවේ වැඩි කාලයක් රඳවා ගැනීමට සිදුවීමෙන් වියදම් ඉහළ යන බවයි.
මෙම තත්ත්වය තුළ විදේශීය ක්‍රීඩකයන්ගේ සේවය ලබා ගන්නා ක්‍රීඩා සමාජ කීපයක් ඔවුන්ගේ සේවය අවසන් කිරීමට සළකා බලමින් සිටින බවද වාර්තා වේ. තරඟාවලියේ නීති රීති අනුව ඊට සහභාගීවන එක් කණ්ඩායමකට උපරිම වශයෙන් විදේශීය ක්‍රීඩකයන් තිදෙනෙකු ඇතුළත් කළ හැකිය. ඉන් දෙදෙනකු යුරෝපීය රටවලිනුත් එක් අයෙකු ආසියානු රටකින් ද වන පරි දි එහිදී විදේශීය ක්‍රීඩකයන් සිය කණ්ඩායමට නිර්දේශ කරගත යුතුය.
මෙම තරගාවලියේ නීති රීති අනුව ඊට සහභාගී වන ක්‍රීඩා සමාජ සීමිත සාමාගම් ලෙස ලියාපදිංචි කර තිබේ.
මෙම ලීග් තරගාවලියේ දී ත්‍යාග ලෙස පමණක් රුපියල් කෝටි තුනක් ලබාදේ.
ඔබේ අදහස් එවන්න.
ඔබේ අදහස් සිංහලෙන්, ඉංග්‍රීසියෙන් හෝ සිංහල ශබ්ද ඉංග්‍රීසි අකුරෙන් ලියා එවන්න.
